Монголын Банк Бус Санхүүгийн Байгууллагуудын Холбооны 20 жилийн Ойн хурал 2022 оны 12-р сарын 17-ны өдөр ёслол төгөлдөр болж өндөрлөлөө. Хуралд СЗХороо, МҮХАҮТанхим, МБХолбоо, МҮЦАЭХолбоо, МБСАкедими, Санхүүгийн Боловсролын Хаб зэрэг хамтран ажилладаг болон гишүүн байгууллагуудын удирдлагууд, зочид төлөөлөгчид оролцлоо. Хурлаар өнгөрсөн хугацааны ололт, амжилтаа дүгнэн, цаашид авч хэрэгжүүлэх томоохон үйл ажиллагааны чиглэлийг тодорхойлсон бөгөөд “Монгол Улсын нийгэм, байгаль орчинд ээлтэй тогтвортой санхүүжилтийн тогтолцоог хөгжүүлэх, ногоон зээлийг дэмжихийн төлөөх хамтарсан тунхаг бичиг”-ийг МББСБХолбоо, СЗХороо, салбарын томоохон төлөөлөл болох 20 ББСБ-тай хамтран байгуулсан бөгөөд эдгээр байгууллагууд нь нийт зээлийн багцынхаа 10 хувийг ногоон зээл болгох зорилго тавин тогтвортой санхүүжилтийн зорилгын хүрээнд ажиллах юм.
Хурлын үеэр МББСБХолбооны Ерөнхийлөгч З.Алтанзул “Холбоо 20 жилийн туршид 3 үндсэн зорилгын хүрээнд үйл ажиллагаагаа амжилттай хэрэгжүүлж ирсэн бөгөөд оролцогч талуудын хууль ёсны эрх ашгийг хамгаалах, салбарын үйл ажиллагааг олон нийтэд таниулах, дотоод гадаадын стандартыг салбартаа хэвшүүлэх, ажилтнуудын мэргэжил дээшлүүлэхэд нь дэмжих, мөн гадаад дотоодын холбогдох байгууллагуудтай түншлэл, хамтын ажиллагааг хөгжүүлж гишүүддээ үнэ цэнэ бий болгох зорилтуудыг амжилттай хэрэгжүүлжээ. Анхлан бичил, жижиг, дунд бизнесүүдийг дэмжих зээлийн үйлчилгээ давамгайлж байсан салбар байсан бол өнөөдөр 4,500-аад боловсон хүчинтэй, 10 жилийн өмнө 229 тэрбум төгрөг байсан нийт хөрөнгө 3,4 их наяд төгрөг болж 15 дахин өсөж зах зээлийн боломжийг алдалгүй хөгжүүлж чадсан байна. Өөрөөр хэлбэл харилцагчийн эрэлт хэрэгцээнд нийцсэн тус бүрийн төрөлжсөн, мэргэшсэн, цахим шийдлийг ашиглан үйлчилгээг хүргэж санхүүгийн салбарт өрсөлдөөнийг нэмэгдүүлэн ажиллаж байна. Энэ өсөлт дэвшил нь холбоо судалгаа шинжилгээний сууриа бэхжүүлж, санхүүгийн хүртээмжийг нэмэгдүүлэх тал дээр ажиллах хэрэгцээг улам нэмэгдүүлж байна” гэв.
Мөн “БИД” ББСБ-ын үүсгэн байгуулагч, ТУЗ-ийн дарга, МББСБХ-ны Ерөнхийлөгч асан, Удирдах зөвлөлийн гишүүн А.Алтансүх “Манай салбар энэ оны 3-р улирлын байдлаарх тоон мэдээллээс харвал 3.4 их наяд төгрөгийн актив хөрөнгөтэй, 4.9 сая харилцагчтай болжээ. Энэ нь технологийн шийдэл дээр суурилж санхүүгийн хүртээмжийг нэмэгдүүлснээр цар тахлын өмнөх үеэс хоёр дахин өсөх болсон шалтгаан гэж болно гэлээ. Тэрбээр салбарын үйл ажиллагааг цаашид илүү хөгжүүлэх, эрсдэлийг бууруулах, хүртээмжийг нэмэгдүүлэхийн тулд хэрхэн ажиллах, ямар гарц шийдэл байгааг хамтдаа хэлэлцэн ярилцах, нэг зүгт харж хөгжих нь чухал гэдгийг тодотгосон” хэлсэн юм.
Энэ үеэр СЗХ-ны ББСБГ-ын дарга Б.Итгэлсүрэн “20 гаруй жилийн хугацаанд идэвхи зүтгэлтэй ажиллаж өдий хүртэл хөгжүүлсэн салбарынханд баярын мэнд хүргэе. Энэ салбар өдгөө 4.5 мянган ажилтантай болжээ. Санхүүгийн хүртээмжийг нэмэгдүүлэхэд тодорхой хувь нэмрийг оруулж байгаа нь та бүхний ажлын амжилт гэдгийг онцлон тэмдэглэе. Мөн Хөрөнгөөр баталгаажсан үнэт цаасны тухай хуулийг банк бус санхүүгийн байгууллагууд зах зээл дээр бодитоор хэрэгжүүлж байна. Банк бус санхүүгийн үйл ажиллагааны хуулийн шинэчилсэн найруулгын төслийг энэ оны хаврын чуулганаар өргөн барьсан. Ирэх оны хаврын чуулганаар хэлэлцүүлэн батлана гэдэгт итгэлтэй байна” гэж байлаа.
Мөн хурлын үеэр МҮХАҮТанхим, СЗХороо болон МББСБХолбоо-ны шагналуудыг гардуулсан юм.
МББСБХолбооны 20-н жилийн түүхийг бүтээхэд гар бие оролцсон болон өнөөдрийн хөгжлийг бичилцэж буй гишүүн болон хамтран ажилладаг байгууллагууд Та бүхэндээ талархал илэрхийлж Ойн мэндийг дэвшүүлье.
