ББСБ-ЫН ГҮЙЦЭТГЭХ ЗАХИРЛУУДЫГ МЭРГЭШҮҮЛЭХ 3 ӨДРИЙН СУРГАЛТ АМЖИЛТТАЙ БОЛЖ ӨНДӨРЛӨЛӨӨ

Санхүүгийн зохицуулах хорооны 2016 оны 71 дүгээр тогтоолоор батлагдсан “Банк бус санхүүгийн үйл ажиллагааны зохицуулалтын журам”-ын 2.11 дэх хэсэгт “Тусгай зөвшөөрөл авснаас хойш 6 сарын хугацаанд ББСБ-ын удирдлага нь Монголын банк бус санхүүгийн байгууллагуудын холбооноос зохион байгуулсан сургалтад хамрагдаж гэрчилгээ авсан байна.” гэж заасан.

Үүний дагуу 2023 оны 10 дугаар сарын 04-06-ны өдрүүдэд зохион байгуулагдсан энэ удаагийн “ББСБ-ын гүйцэтгэх захирал мэргэшүүлэх сургалт”-д 28 ББСБ-ын 31 гүйцэтгэх захирал, удирдлагууд хамрагдлаа.

Тус сургалтад Санхүүгийн зохицуулах хорооноос Банк бус санхүүгийн байгууллагуудын газрын дарга Б.Итгэлсүрэн, Компанийн засаглал, комплаенсын хэлтсийн дарга А.Авир, Хяналт шалгалт, зохицуулалтын газрын ахлах референт С.Чулуунтогтох мөн тус газрын Мөнгө угаахтай тэмцэх албанаас болон бусад холбогдох төлөөллүүд оролцож “Салбарын өнөөгийн байдал, ББСБ-ын онцлог, хууль эрхзүйн орчин”, “ББСБ-ын үйл ажиллагаанд мөрдөгдөж буй журам, заавар”, “ББСБ-уудад хийгдэж буй зайны болон газар дээрх хяналт шалгалт, ББСБ-ын нягтлан бодох бүртгэл, холбогдох заавар, тайлан мэдээ ирүүлэх”, Мөнгө угаах терроризмийг санхүүжүүлэхтэй тэмцэх чиглэлээр” болон “Компанийн засаглал” зэрэг сэдвүүдээр сургалт орсон бол “Мөнгө угаах гэмт хэрэг” сэдвээр ЦЕГ-ын Эрүүгийн цагдаагийн албаны ЭЗГХТГ-ын МУГХТХ-ийн дарга, цагдаагийн хошууч Э.Сэргэлэнбаатар мөн тус хэлтсийн эрүүгийн мөрдөгч, цагдаагийн ахлах дэслэгч М.Булганхангай нар оролцон бодит кейсүүдийн талаар сонирхолтой сургалт орлоо. Түүнчлэн “ББСБ-ын эрсдэлийн төрлүүд түүний удирдлага”, “Олон улсын бичил санхүүгийн байгууллагын хөгжлийн чиг хандлага”, “Шүүх, шүүхийн шийдвэрийн ажиллагаа”, “ББСБ-ын дотоод хяналт болон дотоод аудитыг бий болгох нь”, “Шинэ хөдөлмөрийн тухай хуулийн бизнест үзүүлэх эерэг ба сөрөг нөлөөлөл” зэрэг сэдвээр салбаруудын болон Холбооны мэргэшсэн багш нар нийт 25 кредит цагийн сургалт орлоо.

Энэхүү бүтэн 3 өдрийн сургалтад идэвхтэй хамрагдаж өөрийн мэдлэг, чадвартаа хөрөнгө оруулсан захирлууддаа болон маш сонирхолтой интерактив сургалт орсон багш нартаа талархал илэрхийлж цаашдын ажилд нь амжилт хүсье.